ພາກລັດ ແລະ ເອກະຊົນ ຮ່ວມກັນປຶກສາຫາລື ກ່ຽວກັບການສ້າງວິດີໂອໂຄສະນາຈຸດໜາຍປາຍທາງທ່ອງທ່ຽວພາກໃຕ້
ໜ່ວຍງານສະເພາະກິດດ້ານການຕະຫຼາດແຂວງຈຳປາສັກ ຫຼື Marketing Taskforce ໄດ້ຈັດງານປຶກສາຫາລື ລະຫວ່າງ ພາກລັດ ແລະ ເອກະຊົນ ໂດຍການສະໜັບສະໜູນຈາກ ອົງການ Swisscontact. ຈຸດປະສົງແມ່ນ ປຶກສາ ແລະ ກຳນົດບັນດາສະຖານທີ່ທ່ອງທ່ຽວໃນພາກໃຕ້ລາວ ໃນການສ້າງວິດີໂອໃໝ່ເພື່ອໃຊ້ເຂົ້າໃນວຽກງານໂຄສະນາຈຸດໜາຍປາຍທາງທ່ອງທ່ຽວພາກໃຕ້ລາວໂດຍລວມ ແລະ ສະເພາະແຂວງ - ແຂວງຈຳປາສັກ, ສາລະວັນ, ເຊກອງ ແລະ ອັດຕະປື. ວິດີໂອດັ່ງກ່າວຈະນຳໃຊ້ເພື່ອສົ່ງເສີມການໂຄສະນາບັນດາແຫຼ່ງທ່ອງຕ່າງໆໃນພາກໃຕ້ລາວໃຫ້ເປັນທີ່ຮູ້ຈັກ ແລະ ປັບປຸງຮູບແບບການໂຄສະນາໃນຊ່ອງທາງອອນລາຍໃຫ້ຫຼາກຫຼາຍຂຶ້ນ.
ງານດັ່ງກ່າວໄດ້ຈັດຂຶ້ນໃນວັນທີ 30 ກໍລະກົດ, ທີ່ ໂຮງແຮມ ສີສຸກ ເຊິ່ງມີຜູ້ເຂົ້າຮ່ວມຫຼາຍກວ່າ 20 ທ່ານ. ຜູ້ເຂົ້າ ຮວ່ມໄດ້ລົງຄະແນນເພື່ອຄັດເລືອກສະຖານທີ່ທ່ອງທ່ຽວທີ່ເໜາະສົມສຳລັບການຖ່າຍທຳວິດີໂອສຳລັບແຕ່ລະແຂວງຜ່ານແບບສອບຖາມອອນລາຍຂອງ Google, ເຊິ່ງແຫຼ່ງທ່ອງທ່ຽວທີ່ໄດ້ຮັບການລົງຄະແນນສຽງຫຼາຍທີ່ສຸດ 10 – 12 ແຫຼ່ງ ຂອງແຕ່ລະແຂວງ ຈະຖືກນຳມາເປັນສະຖານທີ່ໃນການຖ່າຍທຳວິດີໂອ. ໃນນັ້ນ, Discover Laos Today ໄດ້ມີສວ່ນຮວ່ມໃນການອອກແບບ, ຖ່າຍທຳວິດີໂອ ແລະ ໃຫ້ການສະໝັບສະໜູນແກ່ໜ່ວຍງານສະເພາະກິດການຕະຫຼາດແຂວງຈຳປາສັກ.
