ແກ່ນແທ້ຂອງຄວາມງົດງາມ ແລະ ທັນສະໄໝ
ແກ່ນແທ້ຂອງຄວາມງົດງາມ ແລະ ທັນສະໄໝ

ໂພສ

ແກ່ນແທ້ຂອງຄວາມງົດງາມ ແລະ ທັນສະໄໝ

 

ທີ່ພັກບັນຍາກາດດີແຫ່ງໃໝ່ທີ່ຫຼວງພະບາງ.

ພວກເຮົາຄົ້ນພົບສະຖານທີ່ພັກແຫ່ງໃໝ່ ໃນລາຄາທີ່ຈັບຕ້ອງໄດ້ ໃນຕົວເມືອງຫຼວງພະບາງ ທີ່ມີຊື່ວ່າ: ໂຮງແຮມສຸພັດຕຣາ.ດ້ວຍການຕົບແຕ່ງແບບໂຄໂລນຽວ ປະສົມປະສານກັບກິ່ນອາຍຂອງຄວາມເປັນລາວ. ການປະສົມປະສານລະຫວ່າງສອງວັດທະນະທຳບໍ່ພຽງແຕ່ເຂົ້າກັນຢ່າງລົງຕົວ ແຕ່ມັນຍັງເປັນສະຖານທີ່ເຕັມໄປດ້ວຍສິລະປະທີ່ເຕັມໄປດ້ວຍເອກະລັກ ໃນບັນຍາກາດທີ່ງຽບສະຫງົບ.

ຄວາມງົດງາມຂອງອາຄານ ແລະ ການຕົບແຕ່ງຂອງໂຮງແຮມ ສຸພັດຕຣາ ເປັນສີມືການອອກແບບຂອງນັກວິສະວະກອນທີ່ມີຊື່ສຽງຈາກປະເທດໄທ, ທ່ານສະຣາຍຸດ ຟອງວະນາລັກ. ດ້ວຍສະຖານທີ່ຕັ້ງທີ່ບໍ່ຫ່າງໄກຈາກຕົວເມືອງຫຼາຍ,ເພິ່ນຈິ່ງຢາກສ້າງສະຖາປັດຕະຍະກຳໂຄໂລນຽວແບບຝຣັ່ງ ທີ່ມີສິ່ງອຳນວຍຄວາມສະດວກຄົບຖ້ວນ. 

ເມື່ອຍ່າງເຂົ້າມາໃນບໍລິເວນໂຮງແຮມ,ຈະມີພະນັກງານຍືນຕ້ອນຮັບ ແລະ ພາທ່ານເຂົ້າໄປທີ່ລ໋ອບບີ້. ບັນຍາກາດໃນລ໋ອບບີ້ຕົບແຕ່ງດ້ວຍຝາສີຂາວ ແລະ ເຟີນີເຈິີ້ໄມ້ສີເຂັ້ມ, ເຄື່ອງຕົບແຕ່ງພາຍໃນສ່ວໃຫຍ່ຈະເປັນສີເທົາ ແລະ ສີຟ້າຊ່ວຍປັບບັນຍາກາດພາຍໃນຫ້ອງໃຫ້ທ່ານຮູ້ສຶກເຢັນສະບາຍຈາກຄວາມຮ້ອນທີ່ຢູ່ຂ້າງນອກ. ຕັ່ງຮັບແຂກຖືກອອກແບບໃຫ້ຄ້າຍຄືບ່ອນນັ່ງເທິງຫຼັງຊ້າງ ເພື່ອລະນຶກເຖິງສະໄໝທີ່ປະເທດລາວເຄີຍເປັນດິນແດນລ້ານຊ້າງມາກ່ອນ. 

ທາງຫຼັງຂອງຫ້ອງລອບບີ້ແມ່ນ ຮ້ານອາຫານ ລາວເດີມເຊິ່ງເປັນອີກສາຂາໜຶ່ງຂອງຮ້ານອາຫານລາວທີ່ມີຊື່ສຽງທີ່ສຸດໃນນະຄອນຫຼວງວຽງຈັນ. ທ່ານສາມາດຮັບປະທານອາຫານເຊົ້້າໄດ້ທີ່ຫ້ອງອາຫານແຫ່ງນີ້ແລະ ຂໍແນະນຳໃຫ້ບັນດາທ່ານລອງຊິມທັງອາຫານທ່ຽງ ແລະ ອາຫານຄໍ່າພ້ອມ. ພໍ່ຄົວຂອງເພິ່ນນໍາໃຊ້ວັດຖຸດິບຕາມລະດູການທີ່ຫາໄດ້ສົດໆຈາກທ້ອງຖິ່ນ ເພື່ອມາປຸງແຕ່ງ ແລະ ເສີບອາຫານລາວທີ່ແຊບຊ້ອຍໃຫ້ແກ່ທ່ານ ເຊັ່ນ ເມນູແກງປາດຸກໃສ່ໜໍ່ໄມ້ສົ້ມ, ຫຼື ລາບງົວສັບເຊິ່ງເປັນອາຫານດັ້ງເດີມຂອງແຂວງ ຫົວພັນ, ກິນກັບເຂົ້າໜຽວກໍ່າແມ່ນແຊບຫຼາຍ. 

ທ່ານສາມາດນໍາອາຫານ ແລະ ອາຫານວ່າງໄປຮັບປະທານຢູ່ທາງຂ້າງສະລອຍນໍ້າທີ່ມີຄວາມຍາວເຖິງ25 ແມັດເຊິ່ງປູດ້ວຍກະໂລໂທນສີຟ້າອົມຂຽວຊວນໃຫ້ທ່ານຢາກຈຸ່ມຕົວລົງລອຍໃນນໍ້າເຢັນໆ. ທາງໂຮງແຮມໄດ້ກຽມບ່ອນນັ່ງຫຼິ້ນ ແລະ ຕຽງພ້ອມຄັນຮົ່ມຢູ່ບໍລິເວນຂ້າງສະ ເພື່ອໃຫ້ທ່ານໄດ້ນອນອີງພັກຜ່ອນ. ນອກນັ້ນ, ຍັງມີບາຣ໌ແຄມສະນໍ້າທີ່ໃຫ້ບໍລິການເຄື່ອງດື່ມ ແລະ ຄອກເທວຫຼາກຫຼາຍລົດຊາດ ຊ່ວຍເຕີມຄວາມສົດຊື່ນໃຫ້ທ່ານໄດ້. 

ໂຮງແຮມ ສຸພັດຕຣາ ຍັງມີບໍລິການ ນວດສະປາ ສຳລັບທ່ານທີ່ຕ້ອງການການພັກຜ່ອນຢ່າງເຕັມຮູບແບບ, ມີຄອສການດູແລຜິວຫຼາຍຮູບແບບໄວ້ບໍລິການທ່ານເຊັ່ນ ການນວດແຜນບູຮານ ແລະ ຂັດຜິວ ເພື່ອບໍາລຸງຮັກສາສຸຂະພາບຜິວຂອງທ່ານໃນລະຫວ່າງການເດີນທາງ.

ໂຮງແຮມສຸພັດຕຣາປະກອບມີ 37 ຫ້ອງພັກ ທີ່ຕັ້ງຢູ່ອາຄານຮູບແບບຝຣັ່ງຈຳນວນສາມຫຼັງ, ແຕ່ລະຫຼັງຍັງຄົງເອກະລັກຂອງຄວາມເປັນລາວ ຕາມຈຸດປະສົງຂອງທາງໂຮງແຮມທີ່ຢາກຕົບແຕ່ງໂຮງແຮມດ້ວຍສິລະປະທີ່ຊວນໃຫ້ລະນຶກເຖິງປະຫວັດສາດຂອງລາວໃນແຕ່ລະສະໄໝ. ຫ້ອງພັກຂອງເພິ່ນແບ່ງອອກເປັນ ຫ້ອງພິເສດ (Deluxe Rooms), ຫ້ອງວິວສະລອຍນໍ້າ (Pool View Rooms), ຫ້ອງ Junior Suites ແລະ ຫ້ອງສະວີດໃຫຍ່ ສຸພັດຕຣາ (large Souphattra Suite). ຫ້ອງຂອງເພິ່ນມີການຕົບແຕ່ງລັກສະນະຮ່ວມສະໄໝ ແລະ ມີຕຽງນອນທີ່ນຸ້ມສະບາຍ ເພື່ອຮັບປະກັນວ່າການພັກຜ່ອນຂອງທ່ານຈະເຕັມອີ່ມຕະຫຼອດຄືນ. ຫ້ອງພັກຕ່າງໆຍັງມີລະບຽງພ້ອມບ່ອນນັ່ງຫຼິ້ນ ໃຫ້ທ່ານໄດ້ເພີດເພີນກັບວິວສະລອຍນໍ້າ ຫຼື ວິວຂອງຕົວເມືອງຫຼວງພະບາງ. ບາງຫ້ອງຍັງມີປະຕູເຊື່ອມຫ້ອງເຂົ້າກັນ ເໝາະກັບການມາພັກຜ່ອນແບບຄອບຄົວ.

ໂຮງແຮມ ສຸພັດຕຣາ ເຮັດໃຫ້ທ່ານສຳພັດໄດ້ເຖິງຄວາມເປັນເອກະລັກຂອງຫຼວງພະບາງ ດ້ວຍເຄື່ອງອຳນວຍຄວາມສະດວກຢ່າງຄົບຖ້ວນ. ຄວາມມີສະເໜ່ທີ່ໜ້າຄົ້ນຫາຂອງໂຮງແຮມ ຈະເຮັດໃຫ້ທ່ານຢາກກັບມາພັກອີກຄັ້ງ ແລະ ອີກຄັ້ງ.

 

ແປ ແລະ ຮຽບຮຽງໂດຍ ວິໄລສອນ ເຫຼື້ອງ

ຮູບໂດຍ ພູນຊັບ ເທວົງສາ ແລະ ໂຮງແຮມ ສຸພັດຕຣາ

 
POSTED BY

Champa Meuanglao

Champa Meuanglao (CML) is the official inflight magazine of Lao Airlines, the proud national carrier of Laos, that features an interesting cross-section of articles detailing the hottest travel destinations, trendy lifestyles and business ideas. Champa Meuanglao produces is tri-lingual (English, Lao, and Chinese), with content for an audience comprising local and regional frequent business travellers and tourists.