alexametrics ດັ່ງຄົນໃນຄອບຄົວ
ດັ່ງຄົນໃນຄອບຄົວ
ດັ່ງຄົນໃນຄອບຄົວ

ໂພສ

ດັ່ງຄົນໃນຄອບຄົວ

 

ສົ່ງມອບຄວາມຮູ້ສຶກດີໆໃນບັນຍາກາດແບບຄອບຄົວ.

“ທາງຮ້ານນໍ້າຊາ ເຮົາຢາກ ໃຫ້ລູກຄ້າໄດ້ກິນອາຫານຄືດັ່ງທີ່ຄອບຄົວເຮົາກິນທຸກມື້” ຄືອຸດົມການຂອງຄອບຄົວ ດວງດາລາ ໃນການສ້າງ The Tea House Luang Prabang ຫຼື ເຮືອນນໍ້າຊາຫຼວງພະບາງ ຂຶ້ນມາ ເພື່ອໃຫ້ບໍລິການອາຫານ ແລະ ເຄື່ອງດື່ມ ໂດຍສະເພາະ ນໍ້າຊາທີ່ມີຄຸນປະໂຫຍດຕໍ່ສຸຂະພາບ ແລະ ປາສະຈາກສານເຄມີຕໍ່ລູກຄ້າທຸກທ່ານ.

ເຮືອນນໍ້າຊາຫຼວງພະບາງ ເປັນຮ້ານຄາເຟ້ທີ່ຕັ້ງຫ່າງຈາກໃຈກາງເມືອງຫຼວງພະບາງພຽງ 2 ກິໂລແມັດເທົ່ານັ້ນພາຍໃນຮ້ານຕົບແຕ່ງດ້ວຍເຟີນີເຈີໄມ້ ແລະ ອ້ອມຮອບໄປດ້ວຍສວນສີຂຽວ ເຮັດໃຫ້ຮູ້ສຶກສົດຊື່ນທຸກຄັ້ງທີ່ໄດ້ເຂົ້າມາຢ້ຽມຊົມ. ພາຍໃນໂຊນໜຶ່ງຂອງຮ້ານມີການຈັດສະແດງ ແລະ ຂາຍຜະລິດຕະພັນທີ່ເຮັດດ້ວຍສີມືແຮງງານຄົນລາວ. ສ່ວນທາງດ້ານຫຼັງຂອງຮ້ານຈະແມ່ນສວນສີຂຽວທີ່ປູກບັນດາສະໝຸນໄພ ແລະ ຕົ້ນໄມ້ ທີ່ໃຫ້ທັງຄວາມຮູ້ສຶກເຢັນສະບາຍ ແລະ ຄວາມສົດຊື່ນ. ຈາກຄອບຄົວມັກການດື່ມຊາ ແລະ ການຮັບປະທານອາຫານເພື່ອສຸຂະພາບ, ພວກເພິ່ນຈິ່ງຢາກສົ່ງຕໍ່ ແລະ ໃຫ້ບໍລິການພຽງແຕ່ສິ່ງດີໆໃຫ້ລູກຄ້າ. ທາງຮ້ານໄດ້ຮວບຮວມຊາຊັ້ນເລີດຈາກຫຼາຍໆແຂວງໄວ້ໃນຮ້ານເປັນຕົ້ນແມ່ນຊາສີ່ຮ້ອຍປີຈາກແຂວງ ຜົ້ງສາລີ, ຊາຂາວຈາກປາກຊ່ອງ ແລະ ທີ່ພາດບໍ່ໄດ້ກໍຄືຊາໃບມ້ອນ ທີ່ທາງຮ້ານເປັນຄົນເຮັດເອງ. ທາງຮ້ານໄດ້ເລີ່ມຕັ້ງແຕ່ຂັ້ນຕອນການປູກ, ການຂົ້ວ ແລະ ການຕາກໃບຊາເອງ. ຊາໃບມ້ອນຈະສົ່ງຄວາມຫອມອ່ອນໆ, ເມື່ອດື່ມເຂົ້າໄປຈະຮູ້ສຶກສະຫງົບ ແລະ ຜ່ອນຄາຍຈິດໃຈ. 

ນອກຈາກນັ້ນ, ທາງຮ້ານຍັງມີເມນູຊາເຢັນແບບຕ່າງໆໃຫ້ທ່ານໄດ້ລອງຊິມ, ເປັນຕົ້ນແມ່ນຊາສົ້ມພໍດີທີ່ໃຫ້ທັງຄວາມຫວານ ແລະ ຄວາມສົ້ມເໝາະແແກ່ການສ້າງຄວາມສົດຊື່ນຫຼັງຈາກເລາະທ່ຽວຊົມເມືອງແລ້ວ. ແລະ ອີກໜຶ່ງຊາທີ່ຖືວ່າເປັນຊາຂຶ້ນຊື່ຂອງຮ້ານກໍຄື ຊາຂົ້ວຫົວສິງໄຄໃບເຕີຍ ທີ່ໃຫ້ທັງຫອມຈາກສະໝຸນໄພພື້ນບ້ານຂອງລາວ ຍັງໃຫ້ຄວາມຮູ້ສຶກເຢັນຊື່ນໃຈ ແລະ ດັບກະຫາຍຈາກຄວາມຮ້ອນໄດ້ເປັນຢ່າງດີ.

ນອກຈາກນໍ້າຊາຫຼາກຫຼາຍຊະນິດແລ້ວ, ທາງຮ້ານກໍຍັງໃຫ້ບໍລິການອາຫານເພື່ອສຸຂະພາບ ແລະ ເຂົ້າໜົມອີກດ້ວຍ. ວັດຖຸດິບທີ່ນໍາມາປຸງແຕ່ງອາຫານສ່ວນໃຫຍ່ແມ່ນມາຈາກສວນຂອງຄອບຄົວ ດວງດາລາເອງ ທີ່ບໍ່ໄດ້ໃສ່ສານເລັ່ງການຈະເລີນເຕີບໂຕ ຫຼື ສານເຄມີໃດໆທັງສິ້ນ. ສະນັ້ນ, ອາຫານທຸກຈານຈິ່ງຮັບປະກັນໄດ້ເຖິງຄວາມສົດສະອາດ ແລະ ແຊບຊ້ອຍອີກດ້ວຍ. ໃນໄວໆນີ້, ທາງຮ້ານຈະໄດ້ມີການຈັດກິດຈະກຳໃຫ້ລູກຄ້າສາມາດໄປເກັບເອົາພືດຜັກຈາກສວນ ເຊິ່ງລູກຄ້າຈະໄດ້ຮັບປະທານອາຫານຈາກວັດຖຸດິບທີ່ຕົນເປັນຄົນເລືອກເອງ.

ເມນູເຂົ້າໜົມຫວານສ່ວນໃຫຍ່ແມ່ນຖືກຄົ້ນຄິດ ໂດຍ ຝ້າຍ ເຊິ່ງເປັນຜູ້ຈັດການເຮືອນນໍ້າຊາຫຼວງພະບາງແຫ່ງນີ້ ທັງເປັນທາຍາດທຸລະກິດລຸ້ນທີ 3 ຂອງຄອບຄົວ. ຝ້າຍມັກທົດລອງ ແລະ ຄິດຄົ້ນສູດເຂົ້າໜົມຫວານໃໝ່ໆ ໂດຍການນໍາເອົາວັດຖຸດິບຂອງລາວ ປະສົມປະສານກັບເຂົ້າໜົມຂອງຕ່າງປະເທດ. ເມນູຂາຍດີປະຈໍາຮ້ານກໍເກີດຂຶ້ນມາຈາກການຄົ້ນຄິດຂອງຝ້າຍເຊັ່ນກັນ, ລາວໄດ້ປະສົມໝາກກູ່ ໝາກຖົ່ວຫາຍາກ ເຊິ່ງເປັນໝາກຖົ່ວປ່າ ທີ່ມີລົດຊາດມັນປະສົມກັບແປ້ງຊອກໂກແລັດຫວານຫອມ ໂຮຍໜ້າໂດຍເມັດແອວມອນ ກາຍເປັນເມນູບຣາວນີ້ຫວານມັນ ເຊິ່ງຖືວ່າເປັນຂອງຂຶ້ນຊື່ອີກໜຶ່ງຢ່າງຂອງຮ້ານ.

ໃນເດືອນນີ້, ທາງຮ້ານຍັງໄດ້ເປີດສອນການເຮັດສະບູຈາກວັດຖຸດິບທຳມະຊາດ ໂດຍຮ່ວມມື ກັບ Lao Natural ເຊິ່ງເປັນກິດຈະກຳທີ່ຄອບຄົວສາມາດເຮັດຮ່ວມກັນໄດ້. ເດັກນ້ອຍຈະໄດ້ເພີດເພີນກັບກິດຈະກຳນອກບ້ານ, ໄດ້ລົງມືສ້າງສັນງານສິລະປະດ້ວຍຕົວພວກເຂົາເອງ ແລະ ໄດ້ໃຊ້ເວລາຮ່ວມກັບຄອບຄົວຫຼາຍຂື້ນ. ໃນທ້າຍປີນີ້, ທາງຮ້ານກໍຍັງຈະເປີດສອນການເຮັດເຈ້ຍສາ ທີ່ຮ່ວມມືກັບຊຸມຊົນບ້ານ ຊ່າງຄ້ອງ ທີ່ເປັນໝູ່ບ້ານ ຂື້ນຊື່ໃນການເຮັດຫັດຖະກຳຕ່າງໆ, ໂດຍທີ່ຜູ້ເຂົ້າຮ່ວມສາມາດໄປເລືອກດອກໄມ້ ແລະ ພືດຜັກຈາກສວນມາເຮັດເປັນເຈ້ຍທີ່ມີລັກສະນະພິເສດຂອງຕົນເອງ.

ຂໍ້ມູນເພີ່ມເຕີມ 

ເຮືອນນໍ້າຊາຫຼວງພະບາງ ຕັ້ງຢູ່ທີ່ບ້ານ ຊ່າງຄ້ອງ, ນະຄອນຫຼວງພະບາງ, ແຂວງ ຫຼວງພະບາງ.

Facebook.com/teahouse-luangprabang ຫຼື ສອບຖາມຂໍ້ມູນເພີ່ມຕື່ມກ່ຽວກັບຫ້ອງຮຽນເຮັດສະບູ ແລະ ເຈ້ຍສາໄດ້ທີ່ເບີ 030 53 58 411 / 020 7777 3224 

 

ຂຽນ ແລະ ຮູບໂດຍ ດວງຕາວັນ ອຸດົມຈິດ

 
POSTED BY

Champa Meuanglao

Champa Meuanglao (CML) is the official inflight magazine of Lao Airlines, the proud national carrier of Laos, that features an interesting cross-section of articles detailing the hottest travel destinations, trendy lifestyles and business ideas. Champa Meuanglao produces is tri-lingual (English, Lao, and Chinese), with content for an audience comprising local and regional frequent business travellers and tourists.