ເລື່ອງເລົ່າຂອງເຫຼົ້າຣັມ

ລາວດີ ເຫຼົ້າຣັມສັນຊາດລາວ ຄຸນນະພາບລະດັບສາກົນ.

ຫ່າງອອກຈາກຕົວເມືອງນະຄອນຫຼວງວຽງຈັນ ພຽງແຕ່ 1 ຊົ່ວໂມງເຄິ່ງ ເຮົາກໍ່ຈະໄດ້ພົບກັບ ໂຮງງານຜະລິດເຫຼົ້າທີ່ມີຊື່ວ່າລາວດີເຊິ່ງເປັນ ໂຮງງານຜະລິດເຫຼົ້າຣັມສັນຊາດລາວ. ອີກພຽງ 30 ນາທີ, ພວກເຮົາຈະຮອດທີ່ໝາຍແລ້ວ. ພວກເຮົາໄດ້ມາຮອດ ພໍດີກັນກັບທີ່ເຈົ້າພາບຂອງເຮົາ ນາງ ແອນນາ ສີຈັນທະວົງ ຍ່າງມາພ້ອມກັບຮອຍຍິ້ມແຫ່ງຄວາມປິຕິຍິນດີ ທີ່ຈະພາພວກເຮົາມາທ່ຽວຊົມໂຮງງານໃນຄັ້ງນີ້ເຊິ່ງພວກເຮົາຈະມາຊອກຫາເຄັດລັບທີ່ແສນພິເສດຂອງເຫຼົ້າຣັມຂອງລາວ.

ກ່ອນອື່ນໝົດ, ຫຼາຍຄົນອາດຈະສົງໄສວ່າ ເຫຼົ້າຣັມໂຕນີ້ມີຄວາມພິເສດຄືແນວໃດ? ໂດຍປົກກະຕິແລ້ວ, ເຫຼົ້າຣັມທົ່ວໆໄປແມ່ນຈະເຮັດມາຈາກກາກນໍ້າຕານໃນຂະນະທີ່ເຫຼົ້າຣັມຂອງ ລາວດີ ແມ່ນເຮັດມາຈາກນໍ້າອ້ອຍ, ຊຶ່ງຈະໃຫ້ລົດຊາດບໍ່ປຸກເທົ່າເຫຼົ້າຣັມແບບທົ່ວໄປ.

ໂຮງງານຜະລິດເຫຼົ້າແຫ່ງນີ້ ຖືວ່າມີຂະໜາດນ້ອຍ ເມື່ອທຽບໃສ່ປະລິມານ ແລະ ຄຸນນະພາບໃນການຜະລິດຂອງໂຮງງານແຫ່ງນີ້ ແລະ ພວກເຂົາກໍມີຄວາມພາກພູມໃຈຫຼາຍທີ່ຂະບວນການທັງໝົດໃນການຜະລິດແມ່ນດຳເນີນໄປໃນຮູບແບບທີ່ເປັນມິດຕໍ່ສິງແວດລ້ອມ ບໍ່ມີສ່ວນປະສົມຂອງສານເຄມີຂອງວັດຖຸດິບການກະເສດທີ່ໃຊ້ເຂົ້າໃນຂະບວນການຜະລິດ. ພ້ອມນັ້ນ, ກໍ່ຍັງໄດ້ໃຊ້ເຍື່ອ ແລະ ເປືອກອ້ອຍທີ່ຜ່ານການຕາກໃຫ້ແຮງມາເປັນເຊື້ອເພີງໃນການໃຫ້ພະລັງງານໃຫ້ແກ່ເຄື່ອງຈັກ, ເຊິ່ງວິທີແນວນີ້ ຊ່ວຍປະຢັດການຊົມໃຊ້ພະລັງງານຂອງນໍ້າມັນໄດ້. ການທີ່ມີແຫຼ່ງນໍ້າຈືດຈາກແມ່ນໍ້າຂອງທີ່ຢູ່ຕິດກັບໂຮງງານ ກໍ່ໄດ້ຊ່ວຍຮັກສາຄຸນນະພາບອ້ອຍທີ່ປູກເພື່ອເປັນ
ວັດຖຸດິບໃນການຜະລິດເຫຼົ້າໄດ້.

ລາວດີ ແມ່ນກໍ່ຕັ້ງໂດຍທ່ານ ອິໂກຊຸ ອິໂນອຸເອະ (Ikozu Inoue) ໃນປີ 2016 ພາຍຫຼັງທີ່ໄດ້ຮັບແຮງບັນດາໃຈຈາກ ເຫຼົ້າຂາວພື້ນເມືອງຂອງປະເທດລາວທີ່ມີຊື່ວ່າ ເຫຼົ້າລາວ ຫຼື ເຫຼົ້າຂາວ, ທ່ານ ອີໂກຊຸ ໄດ້ເຫັນເຖິງຄວາມເປັນໄປໄດ້ ທີ່ເຫຼົ້າພື້ນເມືອງດັ່ງກ່າວ ຈະພັດທະນາໃຫ້ກາຍເປັນຜະລິດຕະພັນທີ່ເປັນທີ່ນິຍົມ ແລະ ມີຊື່ສຽງໄດ້. ເພິ່ນຈຶ່ງໄດ້ເລີ່ມຜະລິດຕະພັນເຫຼົ້າຣັມຂາວສະບັບດັ່ງເດີມອອກມາກ່ອນ. ຕໍ່ມາກໍ່ໄດ້ປັບປຸງ, ແຕ່ງລົດຊາດ ແລະ ປະສົມປະສານບັນດາສ່ວນປະສົມຕ່າງໆໃຫ້ລົງຕົວ, ເຊິ່ງໃນປັດຈຸບັນ ເຫຼົ້າຣັມຍີ່ຫໍ້ ລາວດີ ສາມາດຜະລິດເຫຼົ້າທີ່ມີຫຼາຍລົດຊາດ ຕາມແບບສະບັບຂອງລົດຊາດທີ່ມີຄວາມເປັນອາຊີ ເປັນຕົ້ນ ແມ່ນລົດໝາກພ້າວ, ລົດໝາກໜອດ ແລະ ລົດກາເຟ. ຫຼັງຈາກມີການທົດລອງຫຼາຍຄັ້ງໃນປະສົມສູດຜະລິດເຫຼົ້າຕ່າງໆ, ທ່ານ ອິໂກຊຸກໍ່ຍັງບໍ່ລົດລະຄວາມພະຍາຍາມຂອງເພິ່ນທີ່ຈະພັດທະນາ, ຍັງຄົງສືບຕໍ່ແນວຄິດປະດິດສ້າງເພື່ອພັດທະນາລົດຊາດໃຫ້ດີຂຶ້ນເລື້ອຍໆ.

ເນື່ອງຈາກເຫຼົ້າຣັມຊະນິດນີ້ມີສ່ວນປະສົມຂອງນໍ້າອ້ອຍເປັນຫຼັກ, ເຮັດໃຫ້ຂ້ອຍຄິດວ່າເຫຼົ້າມັນຄືຊິຫວານເກີນໄປສຳລັບລົດຊາດທີ່ຂ້ອຍມັກກິນ. ແຕ່ເມື່ອໄດ້ລອງຊີມເບິ່ງແລ້ວ, ຂ້ອຍເວົ້າໄດ້ວ່າ ສ່ວນປະສົມໃນເຫຼົ້າມັນເຂົ້າກັນແບບພໍດີ. ແລ້ວຊື່ຂອງມັນກໍ່ຈັ່ງແມ່ນເໝາະສົມກັບລົດຊາດ ເຊິ່ງຊື່ທີ່ເອີ້ນວ່າ ລາວດີ ນີ້ມັນດີອີ່ຫຼີ!

ນອກຈາກນີ້, ຜູ້ກໍ່ຕັ້ງເຫຼົ້າ ລາວດີ ຍັງສືບຕໍ່ອາຊີບຂອງການເປັນອາຈານສອນເຄິ່ງເວລາຂອງຕົນຢູ່ທີ່ມະຫາວິທະຍາໄລຟູກຸຢາມາ ຢູ່ປະເທດ ຍີ່ປຸ່ນ.ໃນຂະນະດຽວກັນ,ເພິ່ນກໍ່ໄດ້ສ້າງສູນຝຶກອົບຮົມການຜະລິດເຫຼົ້າຢູ່ ສປປ ລາວ, ເຊິ່ງບັນດາພະນັກງານຂອງເພິ່ນກໍ່ໄດ້ຊ່ວຍປະກອບສ່ວນໃນຂະບວນການຜະລິດ, ໃນການຄົ້ນຄິດສ່ວນປະສົມ, ການບໍລິຫານຈັດການໂຮງງານ ແລະ ການຄວມຄຸມລະບົບຕ່າງໆ.

ການມາທ່ຽວຊົມໂຮງງານໃນຄັ້ງນີ້ ຈະຈົບລົງຢ່າງສົມບູນບໍ່ໄດ້ ຖ້າບໍ່ໄດ້ຊີມເຫຼົ້າຂອງໂຮງງານຈັກໜ້ອຍໜຶ່ງກ່ອນກັບບ້ານ. ນາງ ແອນນາ ໄດ້ຊວນໃຫ້ພວກເຮົາທົດລອງຊີມຕົວຢ່າງເຫຼົ້າຣັມຂອງໂຮງງານຫຼາຍແບບ. ແຊບອີ່ຫຼີ່! ກ່ອນກັບບ້ານ, ຂ້ອຍກໍ່ໄດ້ຊື້ເຫຼົ້າຣັມຂອງລາວດີ ກັບບ້ານມານັ່ງຈິບເບົາໆອີກ3 ແກ້ວ.

ວິທີການເດີນທາງ 

ໂຮງງານຜະລິດເຫຼົ້າຣັມ ລາວດີຕັ້ງຢູ່ຫ່າງຈາກຕົວເມືອງຂອງນະຄອນຫຼວງວຽງຈັນ ເປັນເວລາປະມານ 1.5 ຊົ່ວໂມງ.ການເຂົ້າທ່ຽວຊົມໂຮງງານຈະໃຊ້ເວລາປະມານໜຶ່ງຊົ່ວໂມງ ແລະ ການເຂົ້າຊົມຍັງບໍ່ມີຄ່າໃຊ້ຈ່າຍເທື່ອໃນໄລຍະນີ້.

ທ່ານສາມາດຈອງທົວໄດ້ທີ່ facebook.com/rhumlaodi

ຫຼື ສາມາດໄປລອງດື່ມເຫຼົ້າດັ່ງກ່າວກ່ອນທີ່ຮ້ານເຫຼົ້າຂອງໂຮງງານໃນຕົວເມືອງ, ຕັ້ງຢູ່ແຖວ
ແຄມແມ່ນໍ້າຂອງໃກ້ກັບອົງການແມ່ນໍ້າຂອງ: facebook.com/rumlaodi

ແປ ແລະ ຮຽບຮຽງໂດຍ ສົມໝາຍ ເຮືອນແກ້ວມະນີ

ຮູບໂດຍ ພູນຊັບ ເທວົງສາ