ຄູ່ມືການທ່ຽວ ພູຜາມ່ານ

ພູຜາມ່ານ (The Rock Viewpoint) ເປັນໜຶ່ງໃນກິດຈະກຳການຜະຈົນໄພທີ່ໄດ້ຮັບຄວາມນິຍົມທີ່ສຸດໃນລາວ. ເປີດໃຫ້ບໍລິການໃນປີ 2019 ໂດຍ Inthira Group, ພູຜາມ່ານ ໄດ້ຮັບຄວາມນິຍົມທີ່ສຸດຢູ່ຕະຫຼອດຕັ້ງແຕ່ມື້ເປີດບໍລິການ. ສະຖານທີ່ແຫ່ງນີ້ຕັ້ງຢູ່ທາງທິດເໜືອຂອງແຂວງ ຄຳມ່ວນ, ແລະ ຢູ່ທາງທິດເໜືອສຸດກໍຈະມີ “Thakek Loop” ທີ່ໄດ້ຮັບຄວາມນິຍົມຫຼາຍເຊັ່ນກັນ, ເຊິ່ງທັງ 2ສະຖານທີ່ທ່ອງທ່ຽວນີ້ ເປັນສະຖານທີ່ທີ່ຫ້າມພາດ ສຳລັບໃຜທີ່ມາທ່ຽວທີ່ແຂວງ ຄຳມ່ວນ.

ສະຖານທີ່ນີ້ເປັນທີ່ນິຍົມຫຼາຍ ບໍ່ວ່າຈະເປັນນັກທ່ອງທ່ຽວຈາກຕ່າງປະເທດ ຫຼື ໃນປະເທດ, ເພາະສະຖານທີ່ແຫ່ງນີ້ຈະສ້າງຄວາມປະທັບໃຈໃຫ້ຜູ້ຄົນທີ່ມາສະເໝີ! 

ຮ້ານອາຫານ Khop Chai Der ມີບໍລິການເຄື່ອງດື່ມຕ່າງໆ ແລະ ສິ່ງທີ່ນິຍົມກັນທີ່ສຸດກໍແມ່ນ ກາເຟ ເຊິ່ງເວົ້າກັນວ່າເປັນກາເຟທີ່ດີທີ່ສຸດໃນແຂວງຄຳມ່ວນ. ນອກຈາກນັ້ນຍັງມີບໍລິການອາຫານຕ່າງໆ ບໍ່ວ່າຈະເປັນອາຫານລາວ ແລະ ອາຫານແບບພາກຕາເວັນຕົກ ເຊິ່ງຈະເຮັດໃຫ້ທ່ານໄດ້ກິນອາຫານແຊບໆ ພ້ອມກັບຊົມທິວທັດທຳມະຊາດ ແລະ ພູຫີນປູນທີ່ຢູ່ດ້ານໜ້າແບບຊິວໆ!  

ສຳລັບນັກຜະຈົນໄພທັງຫຼາຍ, ພູຜາມ່ານ ກໍຈະມີກິດຈະກຳຫວາດສຽວໃຫ້ຫຼິ້ນເຊັ່ນກັນ, ບໍ່ວ່າຈະເປັນການຂີ່ສະລິງຜ່ານປ່າໄມ້ສີຂຽວຕຶບໜາ ແລະ ພູຫີນປູນທີ່ແຫຼມຄົມ ແລະ ສູງຊັນທີ່ຢູ່ດ້ານລຸ່ມ ເພື່ອຂ້າມໄປຫາອີກພູຫີນປູນໜຶ່ງ, ການປິນຜາຫີນປູນທີ່ມີຄວາມແຫຼມຄົມດ້ວຍເຟີຣິຕ່າ (Ferrata)  ແລະ ການຍ່າງເທິງຂົວເຊືອກທີ່ເອີ້ນກັນວ່າ “ຂົວໃຍແມງມຸມ” ເຊິ່ງເປັນຂົວເຊືອກທີ່ໃຫຍ່ທີ່ສຸດຂອງອາຊີ. ການທ່ຽວຊົມ ແລະ ສຳຫຼວດພູຜາມ່ານ ແມ່ນຈະໃຊ້ເວລາປະມານ 2ຊົ່ວໂມງ ລວມທັງການຂີ່ສະລິງ, ປິນຜາ, ໄຕ່ຂົວໃຍແມງມຸມ ແລະ ຖ່າຍຮູບຊົມວິວແບບ 360ອົງສາທີ່ຈຸດຊົມວິວເທິງປ່າສະຫງວນ.

ຜູ້ທີ່ຮັກທຳມະຊາດຈະຕ້ອງມັກສະຖານທີ່ນີ້ແນ່ນອນ ເພາະນອກຈາກທ່ານຈະສາມາດຊື່ນຊົມກັບທຳມະຊາດສີຂຽວທີ່ສວຍງາມແລ້ວ ຖ້າທ່ານໂຊກດີ ທ່ານອາດຈະໄດ້ເຫັນລິງ Laotian Langur ທີ່ໃກ້ຈະສູນພັນ ທີ່ອາໄສຢູ່ໃນພື້ນທີ່ອີກດ້ວຍ. ທີ່ປ່າສະຫງວນແຫ່ງນີ້ ມີລິງ Langurs ປະມານ 20ໂຕທີ່ອາໄສຢູ່ໃນພື້ນທີ່ ແລະ ມັກຈະອອກມາໃຫ້ເຫັນຕະຫຼອດ. ຖ້າທ່ານໂຊກດີ ທ່ານອາດຈະສາມາດເບິ່ງເຫັນລິງ Langurs ໄດ້ຈາກຮ້ານອາຫານ ຫຼື ໃນຂະນະທີ່ທ່ານຂີ່ສະລິງຢູ່.

ວິທີທີ່ດີທີ່ສຸດໃນການທ່ຽວພູຜາມ່ານຄື ຈອງທົວເບິ່ງຕາເວັນຕົກດິນ. ເພີດເພີນໄປກັບການຂີ່ສະລິງ, ໄຕ່ຂົວ, ແລະ ການປີນຜາຫີນປູນດ້ວຍເຟີຣິຕ່າ (Ferrata), ໃນຂະນະທີ່ທ່ານຫຼິ້ນກິດຈະກຳຕ່າງໆເພື່ອໄປໃຫ້ຮອດຈຸດຊົມວິວ ຈະມີແສງຕາເວັນທີ່ຄ່ອຍໆຕົກດິນ ສາດສ່ອງໃສ່ສະເໝີ. ເມື່ອມາຮອດຈຸດຊົມວິວທີ່ຢູ່ກາງພູຫີນປູນແລ້ວ ທ່ານຈະໄດ້ຊົມຄວາມງາມຂອງທຳມະຊາດ ແລະ ຕາເວັນຕົກດິນໄດ້ຢ່າງແທ້ຈິງ ພ້ອມກັບອາກາດທີ່ເຢັນສະບາຍເທິງໜ່ວຍພູ. ສຳຜັດປະສົບການເຫຼົ່ານີ້ດ້ວຍຕົວທ່ານເອງໄດ້ ທີ່ນີ້.

ພູຜາມ່ານ ເປັນສະຖານທີ່ທ່ອງທ່ຽວຍອດນິຍົມ ແລະ ມີນັກທ່ອງທ່ຽວຫຼາຍຕະຫຼອດ. ເຫຼົ່ານີ້ແມ່ນຄຳແນະນຳຈາກພວກເຮົາ ເພື່ອທີ່ທ່ານຈະໄດ້ບໍ່ເສຍເວລາ ແລະ ໄດ້ສຳຜັດກັບຄວາມສວຍງາມນີ້ໄດ້ຢ່າງເຕັມທີ່:

• ຈອງລ່ວງໜ້າ, ໂດຍສະເພາະຊ່ວງທ້າຍອາທິດ ແລະ ຊ່ວງວັນເທດສະການຕ່າງໆ. ກິດຈະກຳຂີ່ສະລິງແມ່ນໄດ້ຮັບຄວາມນິຍົມຫຼາຍ ແລະ ມີຄົນຈອງຫຼາຍ, ເພື່ອຫລີກລ້ຽງຄວາມຜິດຫວັງທີ່ອາດຈະເກີດຂຶ້ນກັບທ່ານ ພວກເຮົາຂໍແນະນຳ ໃຫ້ທ່ານຈອງທົວລ່ວງໜ້າ ກ່ອນທີ່ທ່ານຈະເດີນທາງ. ສຳຜັດປະສົບການຜະຈົນໄພເຫຼົ່ານີ້ໄດ້ງ່າຍໆ ພຽງກົດທີ່ນີ້!
• ແນະນຳໃຫ້ເອົາຂວດນ້ຳທີ່ສາມາດເຕີມໄດ້ໄປນຳ, ເພາະອາກາດຮ້ານຫຼາຍ ແລະ ທ່ານອາດຈະຢາກດື່ມນ້ຳເຢັນໆຂະນະທີ່ຊົມວິວ.
• ແນະນຳໃຫ້ເອົາຄີມກັນແດດ ແລະ ເສື້ອແຂນຍາວໄປນຳ, ເພາະທ່ານຈະໄດ້ອອກໄປຫຼິ້ນກິດຈະກຳປະມານ 2ຊົ່ວໂມງ ແລະ ມັນກໍມີບ່ອນຮົ່ມພຽງໜ້ອຍດຽວ. ເພື່ອໃຫ້ແນ່ໃຈວ່າທ່ານຈະບໍ່ຖືກແດດໄໝ້.
• ແນະນຳໃຫ້ໃສ່ເກີບຜ້າ, ເພາະທ່ານຈະໄດ້ປີນຜາ ເຊິ່ງມີຫີນທີ່ແຫຼມຄົມ ແລະ ຈະໄດ້ຂີ່ສະລິງອີກດ້ວຍ. ດັ່ງນັ້ນທ່ານຈຶ່ງຕ້ອງໃສ່ເກີບຜ້າ ຫຼື ເກີບທີ່ຈະບໍ່ເຮັດໃຫ້ທ່ານເຈັບເວລາປີນຜາຊັນ ແລະ ເກີບທີ່ຈະບໍ່ຫຼຸດອອກເວລາທີ່ທ່ານຂີ່ສະລິງ
• ແນະນຳໃຫ້ເອົາໂທລະສັບ/ກ້ອງຖ່າຍຮູບຂອງທ່ານໄວ້ໃນກະເປົາ, ເພາະເມື່ອໄປຮອດຈຸດຊົມວິວທ່ານຈະຕ້ອງຢາກຖ່າຍຮູບເກັບໄວ້ເປັນຄວາມຊົງຈຳແນ່ນອນ ແຕ່ທ່ານຄົງຈະບໍ່ຢາກມີປະສົບການທີ່ບໍ່ດີໂດຍການຖີ້ມໂທລະສັບຂອງທ່ານເຂົ້າໄປໃນຮ່ອມພູທີ່ຢູ່ທາງລຸ່ມ. ແນະນຳໃຫ້ກວດເບິ່ງໃຫ້ແນ່ໃຈວ່າໂທລະສັບ ຫຼື ກ້ອງຖ່າຍຮູບຂອງທ່ານຢູ່ໃນກະເປົາຢ່າງປອດໄພແລ້ວ.

ພູຜາມ່ານ ເປັນສະຖານທີ່ທ່ອງທ່ຽວທີ່ນິຍົມທີ່ສຸດແຫ່ງໜຶ່ງຂອງລາວ. ສະນັ້ນ ທ່ານບໍ່ຄວນພາດທີ່ຈະໄປສຳຜັດກັບປະສົບການດີໆເຫຼົ່ານີ້ກັບພວກເຮົາ Discover Laos Today!