ອັບເດດລ່າສຸດກ່ຽວກັບການເປີດປະເທດລາວ 2022

ສະຫຼຸບກອງປະຊຸມຄັ້ງລ່າສຸດທີ່ໄດ້ຈັດຕັ້ງຂຶ້ນໃນວັນທີ່ 26/4/2022 ໂດຍ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ລາວຈະເປີດປະເທດຕ້ອນຮັບນັກທ່ອງມທ່ຽວຕ່າງປະເທດເຕັມຮູບແບບ (Fully Opened) ເລີ່ມວັນທີ່ 1 ພຶດສະພາ 2022 ເປັນຕົ້ນໄປ, ໂດຍມີລາຍລະອຽດດັ່ງນີ້:

ເງື່ອນໄຂຂອງນັກທ່ອງທ່ຽວທີ່ຈະເດີນທາງເຂົ້າມາທ່ອງທ່ຽວ ສປປ ລາວ

ກ່ອນເດີນທາງເຂົ້າມາ ສປປ ລາວ:

1. ເປີດຕ້ອນຮັບນັກທ່ອງທ່ຽວທຸກຮູບແບບ ບໍ່ວ່າຈະເປັນນັກທ່ອງທ່ຽວເດີນທາງເຂົ້າມາຜ່ານບໍລິສັດທ່ອງທ່ຽວ ຫຼື ເດີນທາງເຂົ້າມາດ້ວຍຕົນເອງ.
2. ຕ້ອງມີໃບຢັ້ງຢືນການສັກວັກຊີນຄົບ 2 ເຂັມ ບໍ່ຫຼຸດ 14 ມື້ກ່ອນມື້ອອກເດີນທາງ ຫຼື ມີໃບຢັ້ງຢືນການເຄີຍຕິດເຊື້ອໂຄວິດ (ຍົກເວັ້ນຜູ້ເດີນທາງທີ່ມີອາຍຸຕ່ຳກວ່າ 18 ປີ ບໍ່ຈຳເປັນຕ້ອງມີໃບຢັ້ງຢືນການເດີນທາງ).
3. ສຳລັບນັກທ່ອງທ່ຽວທີ່ມີໃບຢັ້ງຢືນການສັກວັກຊີນຄົບໂດສ ແລະ ເດັກນ້ອຍອາຍຸຕ້ຳກວ່າ 5 ປີ ຈະບໍ່ມີການກວດ RT-PCR ກ່ອນເດີນທາງເຂົ້າ ສປປ ລາວ; ສ່ວນຜູ້ທີ່ບໍ່ທັນມີໃບຢັ້ງຢືນສັກວັກຊີນຄົບໂດສ ແມ່ນໃຫ້ມີໃບຢັ້ງຢືນການກວດ RT-PCR ກ່ອນເດີນທາງ 72 ຊົ່ວໂມງ, ເມື່ອເດີນທາງມາຮອດ ສປປ ລາວທຸກຄົນຕ້ອງໄດ້ກວດຫາເຊື້ອດ້ວຍເຄື່ອງ RDT/ATK ຖ້າຜົນກວດເປັນລົບ ແມ່ນອະນຸຍາດໃຫ້ເຄື່ອນໄຫວຕາມແຜນການໄດ້.
4. ນັກທ່ອງທ່ຽວຊາຍແດນ ມາທ່ອງທ່ຽວຕອນເຊົ້າ ເດີນທາງກັບດອນແລງ (1 day tripper) ແມ່ນຕ້ອງມີໃບຢັ້ງຢືນການສັກວັກຊີນ ແລະ ຕ້ອງໄດ້ກວດຫາເຊື້ອດ້ວຍລະບົບ RDT/ATK, ສ່ວນຜູ້ທີ່ບໍ່ມີໃບຢັ້ງຢືນສັກວັກຊີນ ແມ່ນຕ້ອງໄດ້ກວດກາຫາເຊື້ອດ້ວຍລະບົບ RT-PCR ທີ່ມີຜົນເປັນລົບ (ບໍ່ມີເຊື້ອ) ພາຍໃນ 48 ຊົ່ວໂມງກ່ອນເດີນທາງເຂົ້າມາ ສປປ ລາວ.
5. ນັກທ່ອງທ່ຽວ ສາມາດເອົາວີຊ່າກັບດ່ານ ຫຼື E-Visa ໄດ້; ສຳລັບພົນລະເມືອງຂອງປະເທດທີ່ມີສັນຍາຍົກເວັ້ນວີຊ່າກັບ ສປປ ລາວ ສອງຝ່າຍ ຫຼື ຝ່າຍດຽວ ສາມາດເດີນທາງເຂົ້າມາ ສປປ ລາວ ໂດຍບໍ່ຈຳເປັນຕ້ອງຂໍວີຊ່າ.
6. ນັກທ່ອງທ່ຽວຕ້ອງຊື້ປະກັນໄພສຸຂະພາບ ຫຼື ປະກັນໄພໂຄວິດ ທີ່ມີວົງເງິນຄ້ຳປະກັນຢ່າງຕ່ຳ 10,000 ໂດລາ ສາມາດຊື້ມາແຕ່ປະເທດຕົ້ນທາງ ຫຼື ຊື້ກັບບໍລິສັດປະກັນໄພຢູ່ ສປປ ລາວ.

ເວລາມາຮອດ ສປປ ລາວ:

1. ກວດແບບໄວ (RDT/ATK) ໂດຍບຸກຄະລາກອນທາງການແພດສຳລັບນັກທ່ອງທ່ຽວທີ່ມາຜ່ານການບໍລິການຂອງບໍລິສັດທ່ອງທ່ຽວ ສາມາດເກັບຕົວຢ່າງກວດຫາເຊື້ອ ແລະ ລໍຖ້າຜົນກວດຢູ່ສະຖານທີ່ພັກແຮມທີ່ທາງບໍລິສັດກະກຽມໄວ້, ສຳລັບນັກທ່ອງທ່ຽວທີ່ເດີນທາງມາດ້ວຍຕົນເອງແມ່ນຈະໄດ້ລໍຖ້າຜົນກວດບໍ່ເກີນ 1 ຊົ່ວໂມງ.
2. ຖ້າຜົນກວດເປັນລົບ ແມ່ນບໍ່ຈຳກັດບໍລິເວນ ສາມາດເດີນທາງໄປທ່ອງທ່ຽວໄດ້ເລີຍ. ຖ້າຜົນກວດເປັນບວກ ແມ່ນຕ້ອງໄດ້ປິ່ນປົວຕາມມາດຕະການຂອງຄະນະສະເພາະກິດວາງອອກຢ່າງເຂັ້ມງວດ, ເມື່ອປິ່ນປົວຫາຍດີແລ້ວ ແມ່ນສາມາດເດີນທາງທ່ອງທ່ຽວໄດ້.
3. ສຳລັບຜູ້ທີ່ບໍ່ທັນຮັບວັກຊີນຄົບໂດສ ເຖິງວ່າຈະກວດ RDT/ATK ບໍ່ພົບເຊື້ອ ກໍຕ້ອງໄດ້ກັກບໍລິເວນໃຫ້ຄົບ 7 ວັນ.

ເວລາທ່ອງທ່ຽວພາຍໃນ ສປປ ລາວ:

1. ນັກທ່ອງທ່ຽວຕ້ອງໃສ່ຜ້າອັດປາກ-ດັງ, ຮັກສາໄລຍະຫ່າງ, ໝັ່ນລ້າງມືດ້ວຍສະບູ ຫຼື ເຈວທີ່ມີສ່ວນປະສົມຂອງເຫຼົ້າ.
2. ສັງເກດເບິ່ງອາການຂອງຕົນເອງ ຖ້າຫາກມີອາການສົງໄສຕິດເຊື້ອ ຫຼື ມີຄວາມສ່ຽງ ແມ່ນໃຫ້ກວດດ້ວຍຕົນເອງ, ຖ້າຜົນກວດເປັນບວກ ໃຫ້ແຈ້ງໃຫ້ໂຮງແຮມ ຫຼື ສະຖານທີ່ທີ່ນັກທ່ອງທ່ຽວພັກເຊົາຢູ່ຢ່າງຮີບດ່ວນ ເພື່ອໃຫ້ໂຮງແຮມຊ່ວຍແຈ້ງໃຫ້ໂຮງໝໍຕາມເບີໂທສຸກເສີນຂອງແຕ່ລະແຂວງ.

ກ່ອນເດີນທາງອອກປະເທດ:

ກວດ RT-PCR ຫຼື ຕາມເງື່ອນໄຂຂອງປະເທດປາຍທາງກຳນົດ.

ກຳນົດເຂດທ່ອງທ່ຽວໃນ ສປປ ລາວ:

ນັກທ່ອງທ່ຽວສາມາດເດີນທາງໄປທ່ອງທ່ຽວໂດຍບໍ່ຈຳກັດແຂວງ, ສາມາດທ່ອງທ່ຽວໄດ້ຕາມສະຖານທີ່ທ່ອງທ່ຽວທີ່ໂດດເດັ່ນທາງທຳມະຊາດ, ວັດທະນະທຳ, ປະຫວັດສາດ ແລະ ກະສິກຳຢູ່ນະຄອນຫຼວງວຽງຈັນ ແລະ ບັນດາແຂວງທົ່ວປະເທດ.

--------

ຕິດຕາມພວກເຮົາໄດ້ທີ່:
Facebook: http://www.facebook.com/discoverlaostoday

Instagram: https://www.instagram.com/discoverlaostoday/
Youtube: https://www.youtube.com/c/DiscoverLaosToday

ເລືອກເບິ່ງທົວທົ່ວປະເທດລາວ/ໂຮງແຮມ/ປີ້ຍົນ/ແພັກເກັດ/ປີ້ລົດໄຟ/ຮ້ານອາຫານ ເພີ່ມເຕີມໄດ້ທີ່: www.discoverlaos.today