ຄົ້ນຄວາມລັບຂອງຜາສາດຫິນ

ຈໍາປາສັກເຜີຍໃຫ້ເຫັນເຖິງຄວາມສວຍສົດງົດງາມ ແລະ ປະຫວັດສາດອັນເກົ່າແກ່ຂອງວັດພູ ລໍຖ້າໃຫ້ທ່ານໄປຢ້ຽມຊົມ.

ເມືອງຈຳປາສັກ ຕັ້ງຢູ່ໃນເຂດທີ່ຖືວ່າເປັນອີກໜຶ່ງຈຸດທີ່ງາມທີ່ສຸດໃນປະເທດລາວ, ເມືອງນ້ອຍໆແຫ່ງນີ້ເປັນປະຕູສູ່ວັດວາອາຮາມອັນເກົ່າແກ່ທີ່ຕັ້ງລຽງລາຍຕາມເນີນພູ ແລະ ມີປະຫວັດສາດອັນລຶກລັບໃຫ້ທ່ານໄດ້ຄົ້ນຫານັກທ່ອງທ່ຽວທີ່ຂ້າພະເຈົ້າໄດ້ພົບໃນມື້ນີ້ ບອກກັບຂ້າພະເຈົ້າວ່າເຂົາເຈົ້າຈະເດີນທາງຈາກປາກເຊໄປສີ່ພັນດອນເລີຍ, ແຕ່
ຂ້າພະເຈົ້າໄດ້ບອກເຂົາເຈົ້າວ່າ ພວກເຂົາກຳລັງພາດ ຖ້າຫາກບໍ່ໄດ້ແວ່ທ່ຽວເມືອງແຄມນໍ້າແຫ່ງນີ້, ເມືອງທີ່ເຕັມໄປດ້ວຍວັດວາອາຮາມຕ່າງໆ, ເຮືອນຊົງລາວ, ພຣະຣາຊະວັງອັນເກົ່າແກ່, ຮ້ານຄ້າ ແລະ ຮ້ານອາຫານຕ່າງໆ ເຊິ່ງເປັນບ່ອນທີ່ພວກເຂົາບໍ່ຄວນພາດຫຼັງຈາກທ່ຽວຊົມ ວັດພູ ເຊິ່ງອົງການອຸຍເນສໂກຍົກໃຫ້ເປັນສະຖານທີ່ມໍລະດົກໂລກ.

ວັດພູຕັ້ງຢູ່ເທິງພູສັກສິດທີ່ມີຮູບຮ່າງລັກສະນະຄ້າຍຄືລິງຄະປະຣະວະຕະ ເຊິ່ງເປັນສັນຍາລັກຂອງພຣະສິວະໃນສາສະໜາຮິນດູ ຫຼື ທີ່ຄົນລາວເອີ້ນພູໜ່ວຍນີ້ວ່າ ພູເກົ້າ. ຜາສາດຫີນແຫ່ງນີ້ໄດ້ຮັບການສ້າງຕັ້ງຂຶ້ນໃນລະຫວ່າງສະຕະວັດທີ 11 ເຖິງ ສະຕະວັດທີ່ໂດຍໄດ້ມີພຣະສິວະ, ນັກພຸດທະສາສະນິກະຊົນ ແລະ ຜູ້ສະແຫວງບຸນຕ່າງໆ ເຂົ້າຢ້ຽມຊົມ, ສັກລະບູຊາ ນັບເປັນເວລາຫຼາຍພັນປີມາແລ້ວ.ສະຖານທີ່ແຫ່ງນີ້ໄດ້ກາຍເປັນທີ່ຮູ້ຈັກຕໍ່ຊາວຕາເວັນຕົກ ໃນຊຸມປີ 1860 ເຊິ່ງເປັນໄລຍະທີ່ກຸ່ມນັກສຳຫຼວດຊາວຝຣັ່ງໄດ້ມາພົບຄວາມງາມຂອງສະຖານທີ່ດັ່ງກ່າວ ໃນໄລຍະການສຳຫຼວດແມ່ນໍ້າຂອງ. ມັນໄດ້ສ້າງຄວາມຕື່ນເຕັ້ນຢ່າງໃຫຍ່ໃຫ້ແກ່ບັນດານັກສຳຫຼວດ ໃນການຂ້າມຜ່ານສະຖານທີ່ທີ່ປົກຄຸມດ້ວຍປ່າໜາທຶບ ຈົນມາພົບກັບສະຖານທີ່ສັກສິດແຫ່ງນີ້.

ເນື່ອງຈາກຮູບລັກສະນະຂອງວັດພູທີ່ຊັບຊ້ອນຈິ່ງເຮັດໃຫ້ຜູ້ທີ່ເຂົ້າມາຢ້ຽມຊົມບໍ່ສາມາດແນມເຫັນທຸກໆສະຖານທີ່ ແລະ ອາຄານຕ່າງໆຂອງວັດໃນທັນທີໄດ້. ທ່ານຈະໄດ້ພົບກັບອາຄານ ແລະ ບູຮານສະຖານ ເມື່ອທ່ານຍ່າງຂຶ້ນໄປຕາມແຕ່ລະຊັ້ນຂອງພູ ໄປຈົນຮອດສະຖານທີ່ສັກສິດເຊິ່ງຕັ້ງໃນຈຸດທີ່ສູງທີ່ສຸດ. ຊັ້ນລຸ່ມຈະມີສະນໍ້າຂະໜາດໃຫຍ່ 2 ສະ ແລະ ເມື່ອຜ່ານສະນໍ້າທັງສອງທ່ານກໍໄດ້ຈະໄດ້ພົບກັບຜາສາດຫີນ ຫຼື ບາລາຍ ສອງຫຼັງທີ່ມີລວດລາຍສິລະປະຕາມແຜນຫີນຂອງອາຄານ. ເມືອງຜ່ານບາລາຍທັງສອງຫຼັງ, ທ່ານຈະໄດ້ຂຶ້ນໄປຕາມຂັ້ນໄດ ເຊິ່ງສອງຟາກທາງປະດັບປະດາດ້ວຍຕົ້ນດອກຈໍາ ແລະ ດອກໄມ້ ໃຫ້ຄວາມຮູ້ສຶກຄ້າຍຄືທ່ານກຳລັງກ້າວໄປສູ່ເສັ້ນທາງສັກສິດຂອງເທບພະເຈົ້າກໍວ່າໄດ້.

ມັນເປັນສິ່ງທີ່ກະສັດຂອງຂະແມວາງແຜນໄວ້ແລ້ວ,ກ່າວໂດຍ ທ່ານ David Bazin, ຜູ້ຊ່ວຍນັກຄົ້ນຄວ້າທາງດ້ານໂບຮານຄະດີຂອງວັດພູ ແລະໄດ້ອະທິບາຍເພີ່ມວ່າສາສະໜາຮິນດູ, ສະຖານທີ່ນີ້ ແລະ ພະລັງວິນຍານຂອງສະຖານທີ່ແຫ່ງນີ້ ແມ່ນຖືກໃຊ້ເພື່ອແຜ່ກະຈາຍອິດທິພົນ ແລະສ້າງຄວາມເຄົາລົບນັບຖືຈາກຜູ້ຄົນ

ຄວາມສະຫຼັບຊັບຊ້ອນໃນວັດພູຈຳປາສັກ ແມ່ນໄດ້ສະແດງວັດທະນະທຳຂອງຕົນເອງເທິງແຜ່ນຫີນ. ວັດພູແຫ່ງນີ້ເປັນບໍລິວານຂອງອັງກໍວັດຢູ່ປະເທດກຳປູເຈຍ ເຊິ່ງຕັ້ງຫ່າງຈາກວັດພູຈຳປາສັກປະມານ 240 ກມ. ໂດຍທີ່ການຄົ້ນຄວ້າເມື່ອບໍ່ດົນມານີ້ສ່ອງແສງໃຫ້ເຫັນເຖິງຈຸດປະສົງຂອງການສ້າງວັດພູ. ຕາມທີ່ ທ່ານ David ໄດ້ບອກຂ້າພະເຈົ້າວ່າ ໃນລະຫວ່າງສະຕະວັດທີ 9 ແລະ ສະຕະວັດທີ 13 ພະຣາຊາແຫ່ງອະນາຈັກອັງກໍ ໄດ້ສະໜັບສະໜູນການກໍ່ສ້າງວັດພູ ໂດຍມີຄຳຈາລຶກໃສ່ຫີນຢ່າງລະອຽດ ໄດ້ລະບຸໄວ້ວ່າ ອາວຸດ, ເຂົ້າ ແລະ ເງິນ ແມ່ນໄດ້ສົ່ງມາສະໜັບສະໜູນແຕ່ທາງໄກ.

ທ່ານ ບາຊີນ ໄດ້ອະທິບາຍວ່າມີຄວາມເປັນໄປໄດ້ວ່າສະຖານທີ່ອາດເປັນອານາຈັກທຳອິດຂອງຈັກກະພັດຂະແມ ແລະ ເປັນສະຖານທີ່ເຄົາລົບບູຊາ ເທິງໜ່ວຍພູແຫ່ງນີ້ເມື່ອເຮົາຍ່າງເຂົ້າໄປດ້ານໃນສະຖານທີ່ສັກສິດເຊິ່ງໃນເມື່ອກ່ອນເປັນບ່ອນເຄົາລົບບູຊາສາສະໜາຮິນດູ ເຊິ່ງໃນປະຈຸບັນປ່ຽນມາເປັນສາສະໜາພຸດ, ປະຕູຫີນແມ່ນຖືກແກະສະຫຼັກເປັນຮູບພະອິນ ຂີ່ຊ້າງສາມສຽນ.

ດ້ານໃນຜາສາດໄດ້ປະດິດສະຖານພະພຸດທະຮູບສຳລິດຂະໜາດໃຫຍ່ໄວ້ ແລະ ມີຫ້ອງສັກສິດທີ່ດ້ານຫຼັງ.ໜ້າຜາມີນ້ຳສັກສິດ (ນໍ້າທ່ຽງ) ທີ່ໄຫຼອອກຈາກຍອດພູເກົ້າໄຫຼຜ່ານຫ້ອງສັກສິດ, ໄຫຼຕາມຮູບແກະສະລັກຊີວະລຶງ ອອກໄປທາງດ້ານຂ້າງ. ປະຈຸບັນ, ແມ່ນເຮົາບໍ່ສາມາດເຂົ້າໄປໃນຫ້ອງສັກສິດໄດ້ ເນື່ອງຈາກດ້ານໜ້າຫ້ອງແມ່ນຖືກຄໍ້າດ້ວຍໂຄງສ້າງເພື່ອບໍ່ໃຫ້ອາຄານຖະລົ່ມ.   

ຫຼັງຈາກການທ່ຽວຊົມບູຮານສະຖານວັດພູແລ້ວ, ເຮົາກໍ່ສາມາດພັກຜ່ອນຢ່ອນອາລົມຢູ່ໃນເມືອງຈຳປາສັກ ໂດຍແວ່ດື່ມກາເຟຢູ່ທີ່ຮ້ານກາເຟໃນເມືອງແລະ ຊົມວິຖີຊີວິດຂອງປະຊາຊົນທ້ອງຖິ່ນ, ນັ່ງຊົມວີວນ້ຳຂອງພ້ອມດື່ມເບຍລາວ. ຫຼັງຈາກນັ້ນ, ຈິ່ງເດີນທາງໄປທ່ຽວເກາະດອນທາງໃຕ້ຕໍ່.

ຂໍ້ມູນເພີ່ມເຕີມ:
ງານບຸນນະມັດສະການຜາສາດຫີນວັດພູຈຳປາສັກ ຈັດຂຶ້ນໃນລະຫວ່າງວັນທີກຸມພາ 2020

ເສັ້ນທາງເຂົ້າເຖິງ:
ການບິນລາວມີຖ້ຽວບິນເດີນທາງ
ໄປປາກເຊຈາກຫຼວງພະບາງ, ວຽງຈັນ, ບາງກອກ ແລະ ສຽມລຽບ.

ແປ ແລະ ຮຽບຮຽງໂດຍ ວິໄລສອນ ເຫຼື້ອງ

ຮູບໂດຍ ພູນຊັບ ເທວົງສາ